Vuosttaš allaskuvla mii balvii lea bidjan visot doaimmaid
Sámi allaskuvla lea vuosttaš universitethtasuorggis Norggas mii lea bidjan visot doaimma balvii, ja dan vel dagai buot oktanagas.
- Mii eat váillat maidege dál go čoavddus lea leamaš doaimmas badjel jagi juo, dadjá allaskuvlla teknoligiija- ja doaibmahoavda Lasse Wigelius.
Sámi allaskuvla bijai doaimmaidis Microsoft Azure balvii golggotmánu 2020:s, maŋŋel go ledje plánen sirdima lahka guokte jagi. Nu leat visot neahttadoaimmat olámuttos buot bargiide ja studeanttaide vaikko gos ja goas.
- Mii sáhtiimet váldit atnui buktagiid nu go dat leat oaivvilduvvon adnot, eat ge leat dárbbašan heivehit maidege. Dasa lassin lea ovttasdoaibman geavaheddjiid gaskkas šaddan ollu álkit, deattuha Wigelius.
Rievttes čoavddus dán áiggis
Čoavddus bođii atnui juste rievttes áiggi. Pandemiija, ruovttukantuvrrat ja digitála oahpahus. Bargit ja studeanttat leat leamaš giddejuvvon riikarájiid duohken miehtá Sámi, de lea balvačoavddus leamaš juste dat mii dárbbašuvvui.
Wigelius vásiha ahte proseassa lea leamaš hirpmáhahtti álki. Azure balvii lávket dáhpáhuvai nu ahte buohkat geat leat allaskuvlii čadnojuvvon, fitne campusis. Doppe ožžo buohkat iežaset dihtorsisdoalu ođastuvvot, ođđa e-poastačujuhusa, geavaheaddjinama ja beassansáni. Dan beaivvi rájes besse buohkat dušše joatkit fas bargat iežaset dihtoris vaikko gos, juste seamma čovdosiiguin dego livčče campusis.
Dál lea UiT Norgga Árktalaš Universitehta Romssas, mii barggai ovttas Sámi allaskuvllain ráhkadit dievaslaš balvačovdosa, álggahan seammalágan barggu iežaset ásahusa ráhkkanahttit balvii.
- Loga eambbo dán barggu birra Microsoft iežaset neahttasiiddus movt sii leat ovttasbargan Sámi allaskuvllain ja UiT:in loktet allaskuvlla bálvalusaid ja doaimmaid digitála balvii.
