Historjjálaš dáhpáhus Sámi allaskuvllas
Dál lea vuosttáš geardde go logi masterkandidáhta válde sámi vuođđoskuvllaoahpaheaddjeoahpus mastergráda ovtta beaivvis. Oktiibuot leat otne čađahuvvon čieža masterseminára.
- Lea oalle stuora olahus Sámi allaskuvlii go ná oallugat leat čađahan oahpaheaddjeoahpuid mastera, dadjá Sámi allaskuvlla oahppo- ja dutkanhoavda Áila Márge Varsi Balto.
Diibmá ledje 8 masterseminára vuođđoskuvlaoahpheaddjeoahpus.
- Lea hui illudahtti go nu máŋggas leat geargan masterbargguiguin ja dáinna ovdánemiin leat sámi servodagas ollu ođđa allagelbbolaš oahpaheaddjit másterdásis. Lea duođas illubeaivi studeanttaide, sámi servodahkkii ja Sámi allaskuvlii, lohká goahtejođiheaddji John-Marcus Kuhmunen.
Earenoamáš vuohki movt čađahedje masterovdanbuktimiid
Dán jagi lea maiddái vuosttáš geardde go masterovdanbuktimiid čađahedje neahta badjel. COVID-19 pandemiijaleavvama eastadeami dihte eai sáhttán studeanttat ovdanbuktit masterbargguid fysalaččat Diehtosiiddas, Sámi allaskuvlla oahppobáikkis.
- Visot oahpahus ja eksámenat leat dán giđa čađahuvvon juogo ruovttueksámeniin dahje neahta bokte. Masterseminárat lágiduvvojedje neahta bokte, ja álbmogis lei vejolašvuohta čuovvut ovdanbuktimiid digitálalaččat, muitala Áila Márge Varsi Balto.
