Maid sáhtát čoavdit ovdal go oahppu álgá?
Mii sávvat bures boahtima sihke ođđa ja dálá studeanttaid Sámi allaskuvlii 2021 čavčča.
Muhtun áššiid lea buorre čoavdit ovdal go oahppu álgá. Oahpu álgima oktavuođas lea dávjá ollu mii dáhpáhuvvá, ja ollu áigi sáhttá sestojuvvot jus muhtun áššit leat čovdojuvvon ovdal oahpu álgima.
Mii leat ráhkkanan čađahit oahppojagi ja álggahanvahkku fysalaččat Diehtosiiddas borgemánu 16. beaivvi rájes, ja campus lea rabas sihke min studeanttaide ja bargiide. Mii dárkkistit geažos áiggi gustovaš njoammuneastadeami njuolggadusaid vai lágideamit ja oahpahus čađahuvvojit oadjebas lági mielde.
Somá go válljejit Sámi allaskuvlla oahppobáikin, mii illudit váldit vuosta din mánnodaga rájes!
Maid sáhtát čoavdit ovdal go oahppu álgá?
- Lohkanbadjedivvaga máksit
- Registreret iežat studeantan StudentWeb bokte
- Ohcat orrunbáikki
- Ohcat mánáidgárdesaji
- Norgga beale studeanttat sáhttet ohcat loana ja stipeandda Loatnakássas. Studeanttat ruoŧa – ja suomabeale galget ohcat oahppodoarjaga ruovtturiikkas.
- Logget sisa Canvasii (Liŋka, geavahan- ja beassansáni oaččut maila bokte vahkku 33)
- Viežžat Canvas - appa mobiilatelefovdnii.
- Geahččat diibmoplána, deaivvadanplána, eksámendáhtoniid ja eará dieđuid TimeEdit:as: TimeEdit Samisk Høgskole - Sámi allaskuvla
- Geahččat lohkanmeari - dárbbašat go oastit/luoikkahit girjjiid?
- Oahpásnuvvat Campusin - geahča latnjakárta dáppe.
- Oahpásnuvvat girjerádjosiin
- Diŋgot politiijaduođaštusa jus leat ožžon oahpposaji dáidda oahpuide: Sámi mánáidgárdeoahpaheaddjeoahppu, Sámi vuođđoskuvlaoahpaheaddjeoahppu 1.-7. ceahki master ja Sámi vuođđoskuvlaoahpaheaddjeoahppu 5.-10. ceahki master.
Duođaštusa ozat www.politiet.no siiddus.
Dárbbašat go heiveheami?
Studeanttain main leat earenoamáš dárbbut ja/dahje doaibmahehttejumit lea riekti oažžut heiveheami studeantaárgabeaivái ja eksámenii, vai sihkkarastá dásseárvosaš oahppama ja oahppovejolašvuođaid.
Corona oktavuođas erren
Buohkat geat bohtet olgoriikas Norgii, earret sii geat bohtet ruona riikain/guovlluin Eurohpas, galget leat erremis, muhto das gávdnojit sierra spiehkastagat. Dán siiddus sáhtát geahččat makkár njuolggádusat gustojit dutnje. Váldde "Karantenesjekken" dáppe: Karantensjekk
Sii geat leat ollásit boahkuhuvvon ja sii geain lea leamaš Covid-19 maŋemus 6 mánus, eai dárbbaš mannat erremii. Sii geat leat ožžon vuosttaš boahku gaskkal 3 ja 15 vahkku dassái ja mánát vuollel 18 jagi, fertejit mannat erremii, muhto jus coronaiskkus lea negatiiva de beassá loahpahit errema aramusát 3 jandora maŋŋel go leat boahtán riikii.
FHI siidduin sáhtát lohkat eambbo: www.FHI.no
Koronapassa ja vaksiidna
Koronapassa maid leat ožžon EU ja EØS-riikas, lea dohkkehuvvon Norggás. Studeanttat geat leat váldán Pfeizer, Moderna, Strazenica ja Jansen boahku olggobealde EU ja EØS-riikain (omd. USAs), fertejit registreret dan boahku doaktára luhtte maŋŋel go leat boahtán Norgii ja leat ožžon Norgga personnummara dahje D-nummara.
Váldde oktavuođa
Jus it gávnna vástádusa du gažaldahkii dahje dárbbašat veahki mas nu, de áinnas váldde oktavuođa Sámi allaskuvlla oahppohálddahusain oahppohalddahus@samas.no / +47 78 44 84 00. Mii veahkehit du!
