februar 13. beaivi 2024

Ovttastallan ja siiddat otnábeai servodagas

Siidaskuvla ovttas allaskuvllain lágida Diehtosiiddas 22.-23.2.2024 buohkaide rabas seminára, gos almmuhit guokte girjji ja Sámi dieđalaš áigečállaga fáddánummira, mas siidaskuvlla fáttát leat guovddážis. Seminára ulbmilin lea ságastallat áigeguovdilis servodatlaš fáttáin, numo árbedieđus, siiddaid ja vuoiŋŋalašvuođa mearkkašumis otnážis, sámi eatnamiid ja čáziid gáhttemis ja hálddašeamis. Mii guossohit buohkaide gáfiid.

Ella ja Milot Váimmosvári siiddas (Davvi Girji, 2022) lea Kirste Paltto čállán mánáidgirji, masa Sunná Kádjá Valkeapää lea njuohtan govaid. Girji muitala gávccijahkásaš Ellas ja Milohis, geat oahpásmuvvaba geassejorggáldatija Alla Bávtti luhtte Skierriin, Rásiin ja Gearraliin ja beassaba ádjáska mielde Suhpejávrái oahppat siiddastallamis ja sámi árbevieruin.

Siiddaid Sápmi (DAT, 2024) lea buot sámi lohkkiide oaivvilduvvon čoakkáldat, mas leat esseat, divttat, árbečehpiid jearahallamat ja eará oanehis čállosat, maid ulbmilin lea sámi iešmearrideami ovddideapmi iešguđet eallima ja servodaga surggiin. Siidaskuvlla mihttomearrin lea leamaš guorahallat siidavuogádagaid ealáskahttima ja ovddidit dieđuid ja dáidduid sirdašumi olbmuid ja sohkabuolvvaid gaskkas. Girjji čállosiiguin lea doaivva olahit ain eanet olbmuid. Girjji heive maiddái oahpahanreaidun joatkka- ja allaskuvlla oahpahusas.

Sámi dieđalaš áigečállaga siidaskuvlla fáddánummir 2024:1 sisttisdoallá vihtta dieđalaš artihkkala, maid siidaskuvlla lahtut leat čállán. Artihkkalat gieđahallet sámi ovttastallanvieruid ja daid mearkkašumi otná servodagas, árbevirolaš dieđu Deanu luossahálddašeamis, njálmmálaš árbevieru lágaid gáldun, Durdnosa Sámi guovllu siiddaid ja siiddaolbmuid čálalaš gálduin, ja siidda mearkkašumi Suoma sierralágain Suoma iehčanasvuođa álggu rájes.

Bures boahtin!