Ná ozat Samordna opptak bokte
Oahppu ii deatte, nu dadjá sámi sátnevájas. Sámi allaskuvlla prográmma oahpuide ozat Samordna opptak bokte ja dan oktavuođas leat ráhkadan bagadusa movt galgá ohcat prográmmaoahpuide Samordna opptak bokte.
Ná ozat oahpuide Samordna opptak bokte:
- Manat Samordna Opptak neahttasiidui, ja deaddilat Logg inn. Das vuolábealde lea govva čilgehus.
- Jus dus lea norgga persovdnanummar: Vállje logget sisa elektronisk ID bokte (MinID, BankID, Buypass ID dahje Commfides). Deavdde dieđuid iežat birra ja oktavuođadieđuid. Jus dus leat juo dieđut doppe, de dárkkis daid.
- Jus dus ii leat norgga persovdnanummar: Vállje Gå til innlogging uten norsk fødselsnummer. Jus dus ii leat norgga persovdnanummar, muhto lea geavaheaddji ovdalaččas, de deavdde iežat e – boasta čujuhusa ja vállje Logg inn.
- Jus dus ii leat norgga persovdnanummar ja ii leat geavaheaddji ovdalaččas, de vállje Registrer ny bruker ja deavdde iežat oktavuođadieđuid. Go leat deavdán buot dieđuid, de deaddilat opprett bruker.
- Go leat loggen sisa dahje ráhkadan geavaheaddji, de fertet bidjat elektrovnnalaš oahppoduođaštusa dahje eará duođaštusaid mat duođaštit ahte deavddát oahpu sisabeassangáibádusaid. Dan dagát Elektroniske Vitnemål og dokumenter vuolde.
Fuomáš!
- Jus leat čađahan joatkkaskuvlla Norggas jagis 2000 dahje maŋŋel, de lea dus elektrovnnalaš oahppoduođaštus maid du joatkkaskuvla sádde njuolga Samordna opptak siidui. Jus fuomášat boasttuvuođaid iežat oahppoduođaštusas, de fertet váldit oktavuođa joatkkaskuvllain. Jus don easka dán giđa gárvet joatkkaskuvlla, de sádde du joatkkaskuvla elektrovnnalaš oahppoduođaštusa go leat gárven joatkkaskuvlla.
- Jus it leat čađahan joatkkaskuvlla Norggas, dahje dus ii leat elektrovnnalaš oahppoduođaštus, de fertet ieš bidjat sisa oahppoduođaštusa oahpposajiohcamii. Dan dagat go deaddilat last opp dokument ja iskat vel lea go duođaštus gyldig.
- Go leat iskan ahte du ohcamis leat buot duođaštusat mat duođaštit ahte deavddát oahpu sisabeassángáibádusaid, de sáhtát viimmat álgit ohcat oahpuide. Dan dagat ovdasiiddus go válljet Søknad Universitet og høgskole ja søk her.
- Dál sáhtát ohcat ja válljet iešguđetlágan oahpuid Norgga universitehtain ja allaskuvllain. Go leat gávdnan oahpu masa háliidat ohcat, de deaddilat velg.
- Jus leat válljen máŋga oahpu, de fertet vuoruhit makkár ohppui háliidat buot eanemus beassat sisa, makkár ohppui háliidat nubbineanemus jnv. Dat mearkkaša ahte jus don oaččut oahpposajifálaldaga ohppui mii lea vuosttaš vuoruheamis, de it oaččo oahpposajifálaldaga oahpuide mat leat vuollelis. Dat eará oahput vuoruhanlisttus gáhččet eret. Don sáhtát oktiibuot ohcat 10 iešguđetlágan oahpuide.
- Go leat vuoruhan oahpuid ja iskan ahte du ohcamis leat buot dieđut riekta, de sáddet sisa ohcama.
