Bilde av prorektor og rektor ved samisk høgskole

borgemánu 13. beaivi 2015

Ođđa rektoráhta sajis

Sámi allaskuvlla ođđa rektoráhta

Dás beasat veháš oahpásmuvvat Sámi allaskuvlla ođđa rektoráhtain, rektor Gunvor Guttorm ja prorektor Line Kalak geat leaba dán mánu álgán bargat.

Rektor

Professor Dr. Art Gunvor Guttorm lea bargan Sámi allaskuvllas dan rájis go dat álggahuvvui 1989. Son lea eará bargoguimmiiguin álggahan duodjeoahpuid Sámi allaskuvllas; álggos oahpaheaddjioahpuin ja dađistaga duodjebachelora ja mastera. Son čađahii PhD dáiddasuorggis Tromssa universitehtas. Son lea jagi leamaš Duodji-, luonddu- ja ealáhusgoađis goahtejođiheaddji. Maŋimuš golbma jagi lea leamaš koordináhtorin duodjemasteris. Son lea 2013 rájis leamaš Sámi allaskuvlla stivrra fágabargiid áirrasin. Norgga dutkanráđi sámeprográmma stivrras lea son čohkkán 2012 rájes.
Guttorm lea riegádan 1958 ja bajásšaddan Kárášjogas. Sus lea báiki ja bearaš Johkamohkis.

Prorektor

Master riektediehtagis Line Kalak.
Kalak gárvvistii iežas masteroahppu riektediehtagis juridihkalaš fakultehtas Tromssa Universitehtas 2013. Das ovdal son lea lohkan fitnodatekonomiija, prošeaktajođiheami ja sosiálaantropologiija. Son álggii Sámi allaskuvlii dutkin ja allaskuvlalektorin 2014. Seamma jagi álggii ráđđeaddin Árbediehtoprošeavttas. Ovdal son lea bargan juristan Davvi-Norgga Seastinbáŋkkus finánsaossodagas ja Biebmobearráigeahčus konsuleantan. Line Kalak lea dál stivraláhttu Dutkansearvvis allaskuvllas.
Line Kalak lea riegádan 1980s ja bajásšaddan Lágesvuonas mearrasámi guovllus. Sus leat golbma máná.